ᔪᓚᐃ 10, 2007
ᐃᖃᓗᐃᑦ, ᓄᓇᕗᑦ) ᐃᓄᒃᑎᑐᑦ ᐃᓕᓐᓂᐊᕐᓂᖅ ᐱᒡᒐᓇᙱᓕᒃᑲᓂᕐᓂᐊᓕᖅᑯᖅ ᓴᖅᑭᖅᑕᐅᓂᖓᓄᑦ ᐃᑭᐊᖅᑭᕕᒃᑰᖓᔪᖅ ᖃᕋᓴᐅᔭᒃᑯᑦ, ᑕᐃᔭᖅ ᑐᓵᓚᖓ [www.tusaalanga.ca]. ᑖᓐᓇ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᒃ ᓴᓇᔭᐅᓚᐅᖅᑐᖅ ᐱᕈᕐᕕᑯᓐᓄᑦ, ᐃᓕᓐᓂᐊᑎᑦᑎᓂᕐᒥᒍᑦ ᓄᓇᕗᑦ ᒐᕙᒪᒃᑯᑦ ᒥᓂᔅᑕᐃᑦ ᑐᖏᓕᖏᓐᓂᒃ ᐃᓄᒃᑎᑑᕆᐅᖅᓴᓂᕐᒥᒃ. ᐱᕈᕐᕕᒃ ᑎᒥᖁᑕᐅᔪᖅ ᐃᖃᓗᓐᓂ.
“ᓄᓇᕗᖃᓕᕐᓂᕗᑦ ᐅᖃᕈᓐᓇᕆᐊᖃᓕᕈᑎᒋᒐᑦᑎᒍᑦ ᐃᓄᒃᑎᑐᑦ ᓇᒥᓕᒫᑦᑎᐊᖅ ᐃᖅᑲᓇᐃᔭᕋᓗᐊᕈᑦᑕ” ᐅᖃᖅᑐᖅ ᓖᓇ ᐃᕕᒃ, ᐊᖏᔪᖅᑳᖓᑦ ᐊᒻᒪ ᐱᕈᕐᕕᒻᒥᒃ ᓴᖅᑮᓯᒪᔪᖅ. “ᑐᓵᓚᖓ ᑖᓐᓇ ᓴᓇᓚᐅᖅᑕᕗᑦ ᐃᓕᓐᓂᐊᑎᑦᑎᓂᑦᑎᒍᑦ ᓄᓇᕗᑦ ᒐᕙᒪᒃᑯᑦ ᒥᓂᔅᑕᖏᑕ ᑐᖏᓕᖏᓐᓂᒃ ᒫᓐᓇ ᑕᖅᑲᐅᖓ ᓯᐊᒻᒪᑎᒃᑲᓐᓂᕈᒪᔭᕗᑦ ᐊᑐᖅᑕᐅᖁᓪᓗᒍ ᐊᒥᓱᓄᑦ.”
ᑐᓵᓚᖓ ᑐᔨᖃᕈᑎᓕᒃ ᑐᓵᓚᒍ ᐃᓄᒃᑎᑐᑦ. ᑖᓐᓇ ᐃᑭᐊᖅᑭᕕᒻᒧᑦ ᑐᑭᓯᒋᐊᕐᕕᒃ ᐃᓗᓕᓕᒃ ᑐᓴᖅᓴᐅᔪᓐᓇᖅᑐᓂᒃ ᑕᐃᒎᓯᓂᒃ, ᐅᖃᑦᑎᐊᕈᑎᓂᒃ ᐊᒻᒪᓗ ᐃᙱᐅᓯᓂᒃ ᐃᑲᔫᑎᒃᑲᓐᓂᑦᓴᓂᒃ ᐃᓄᒃᑎᑐᑦ ᐅᖃᖅᑕᐅᔾᔪᓯᖏᓐᓂᒃ. ᐃᓄᒃᑎᑐᑦ ᐋᖅᑭᑦᓯᒪᓂᖏᑦ ᐃᓕᓐᓂᐊᕈᑎᖃᕐᒥᔪᑦ, ᑕᐃᒎᓯᑕᖃᖅᑐᓂᓗ 600-ᓂᒃ. ᑐᓵᓚᖓ ᐱᕈᕐᕕᒃᑯᑦ ᓴᓇᓚᐅᖅᑕᖓᑦ ᐃᑲᔪᖅᑎᖃᖅᑐᑎᒃ ᑲᑐᔾᔨᖃᑎᒥᓐᓂᒃ, Web Networks-ᑯᓐᓂᒃ, ᐊᖅᑯᑎᒋᓪᓗᒍ ᓴᓇᓯᒪᒻᒥᔭᓂ Attavik.net ᐃᑭᐊᖅᑭᕕᒃᑰᑎᑦᑎᕕᒃ.
“ᖃᐅᔨᒪᒐᑦᑕ ᐊᒥᓱᑦ ᑭᒃᑯᑐᐃᓐᓇᐃᑦ ᑕᖅᑳᓂ ᐃᓄᒃᑎᑐᑦ ᐃᓕᑉᐸᓪᓕᐊᔪᒪᔫᒐᓗᐊᑦ ᑭᓯᐊᓂ ᐅᐸᒐᔅᓴᖃᑦᑎᐊᙱᓗᐊᖅᑐᑦ ᐃᓕᓐᓂᐊᑲᓐᓂᕕᑦᓴᓂᒃ, ” ᐅᖃᖅᑐᖅ ᐃᕕᒃ. “ᑐᓵᓚᖓ ᐃᓕᓐᓂᐊᕈᑎᑦᑎᐊᕙᐅᓂᐊᖅᑐᖅ ᑭᒃᑯᑐᐃᓐᓇᕐᓄᑦ ᐃᓄᒃᑎᑑᕆᐅᖅᓴᑲᓐᓂᕈᒪᔪᓄᑦ ᐃᓄᑑᒐᓗᐊᕐᓗᑎᒃ.”
ᐱᕈᕐᕕᒃ ᐃᓕᓐᓂᐊᑎᑦᑎᑲᓐᓂᓂᐊᕐᒥᔪᖅ ᐅᑭᐊᔅᓵᖑᓂᐊᖅᑐᖅ ᖁᕝᕙᓯᓕᕇᓂᒃ ᐱᖓᓱᓂᒃ ᐃᓄᒃᑎᑑᕆᐅᓴᐅᑎᓂᒃ. “ᑐᓵᓚᖓ ᐊᑐᕐᓂᖃᑦᑎᐊᑲᓐᓂᕈᓐᓇᖅᑐᖅ ᓯᓚᑖᒍᑦ ᐃᓕᓐᓂᐊᓯᓐᓈᕐᓗᓂ, ᐅᖃᖅᑐᖅ ᐃᕕᒃ. “ᐃᓇᖏᕋᔅᓴᐅᖏᒻᒪᑦ ᐃᓕᓐᓂᐊᑎᑦᑎᔨᓪᓚᑦᑖᒧᑦ ᐃᓕᓐᓂᐊᖅᑎᑕᐅᓂᖅ.”
ᐱᕈᕐᕕᒃ 2006-ᖑᑎᓪᓗᒍ ᐱᓕᕆᖃᑎᖃᓚᐅᕐᖓᑦ ᒐᕙᒪᒃᑯᑦ ᒥᓂᔅᑕᖏᑕ ᑐᖏᓕᖏᑦ ᐃᓄᒃᑎᑑᕆᐅᖅᓴᖁᓪᓗᒋᑦ. ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᓂᖅᐹᖑᒻᒪᑦ ᓄᓇᕕᒻᒥ ᐊᒻᒪᓗᑦᑕᐅᖅ ᒪᓕᒐᓕᐅᕐᕕᖓᓂ ᐊᑐᖅᑕᐅᕙᑦᑐᓂ. ᓄᓇᕗᑦ ᒐᕙᒪᒃᑯᑦ ᐱᒻᒪᕆᐅᓂᖓᓂᒃ ᐃᓄᒃᑎᑐᑦ ᐱᓇᓱᐊᒐᖃᕐᖓᑕ ᑕᐃᑲᓂᐅᓂᐊᖅᑐᖅ 2020-ᒥ ᐃᓄᒃᑎᑐᑦ ᐊᑐᖅᑕᐅᓂᖅᐹᖑᓂᐊᕐᓗᓂ ᒐᕙᒪᒃᑯᓐᓄᑦ ᐊᒻᒪᓗ ᖁᑦᑎᓛᒃᑯᑦ ᐊᖏᔪᖅᑲᐅᑎᖏᑦ ᐃᓄᒃᑎᑐᑦ ᐅᖃᕈᓐᓇᖅᓯᓯᒪᒋᐊᖃᖅᑎᑕᐅᓪᓗᑎᒃ 2008. ᐊᑦᑕᕕᒃ ᑖᓐᓇ ᑲᑐᔾᔭᐅᓪᓗᓂ ᓴᖅᑭᖅᑕᐅᒪᔪᖅ ᐱᕈᕐᕕᑯᓐᓄᑦ ᐊᒻᒪᓗ Web Networks-ᑯᓐᓄᑦ ᐃᓄᒃᑎᑑᖓᔪᑦ ᐃᑭᐊᖅᑭᕕᒃᑯᑦ ᐊᐅᓚᒐᕐᓂᓂᖅᓴᐅᖁᓪᓗᒋᑦ.